Спатифилиум - корисно и преубаво растение за вашиот дом

City Flowers Skopje

На јазикот на цвеќињата спатифил значи: „Јас ќе те штитам“. Придавањето на ова симболично значење потекнува од обликот на неговиот завиен и заштитен цвет. Подарување на овој цвет е знак на симпатија и наклонетост, а белата боја симболизира чистина и мирољубие.
Исто така ова растение е познато како Женска среќа од причина што постоело верување дека му носи среќа на оној кој го има. За младите немажени девојки се верувало дека ќе имаат среќа во љубовниот живот, а за мажените се верувало дека ќе добијат принова во семејството.
Спатифилиумот спаѓа во групата на растенија кои се природни прочистувачи на воздухот.



 

Кои се идеалните услови за вашиот спатифилиум?

Spathiphyllum wallisii потекнува од Колумбија и е најпознатиот и најпопуларниот вид кој се одгледува од оваа фамилија на растенија. Многу е едноставен за одгледување и е лесно прилагодлив на условите на скоро секој дом. 

Еве кои се оптималните услови за одгледување:
1. Светлина - Спатифилиумот сака светлина, но не и директна изложеност на сонце. Чувајте го на добро осветлно место. Може да опстане и на помалку светли места, но веројатноста да процвета во такви услови е многу мала.

2. Почва - Идеално е почвата да се одржува влажна, но не и мокра. Ова растение потекнува од латино-американските прашуми каде влажноста е многу висока, па затоа за време на топлите летни денови залевањето треба да биде почесто. Во зима залевајте поретко, но не дозволувајте да дојде до пресушување на почвата.

3. Температура - Најдобро е да се одгледува на собна температура од 20-25 °C. Не поднесува ниски температури.

4. Влажност - Поголемо количество на влага во воздухот е добредојдено во текот на целата година. Пожелно е повремено да се прскаат листовите со прскалка со чиста вода. 

5. Прихрана - Во текот на летото, најдобро е да го прихранувате еднаш неделно. Кога ќе дојде есента, престанете со прихраната се до почеток на пролетта кога дневните температури се зголемуваат и денот трае подолго. Секогаш внимавајте со прихраната и употребувајте ја соодветната количина наведена на упатството.

6. Пресадување - Доколку саксијата во која го чувате спатифилумот станува се помала во однос на растението, најдобро е да го пресадите. Направете го тоа на пролет и внимавајте на дното на новата саксија да има пропуслив слој.


 

Најчести проблеми кај Спатифилиумот

  • Листовите се надвиснати и делумно овенати. Ова се најчести знаци дека вашиот Спатифилиум се суши и му недостига вода. Потопете го растението заедно со саксијата во сад со вода и оставете го неколку минути или се додека земјата целосно не се натопи. Во иднина полевајте го Спатифилиумот почесто.

  • Спатифилиумот нема цветови. Најчести причина за недостаток на цветови е недостатокот на хранливи материи во земјата. Потербно е да додадете прихрана. Исто така, прегледајте ги корените за да видите дали е неопходно пресадување. Доколку растението е преголемо, можеби е потребно да го поделите во две саксии. 

  • Листовите се малку пожолтени - Растението е премногу изложено на директна светлина. Преместете го во посенливо место, без директна изложеност на сончева светлина. 

  • Листовите пожолтуваат, а на долната страна од листот има пајажина. Најчест причинител на ова заболување е ларватa на црвениот пајак - red spider mite. Третирајте го Спатифилиумот со Дерис, Малатин или систематичен инсектицид и зголемете ја влажноста на воздухот. 
    Претходно консултирајте се за дозата и начинот на употреба на инсектицидот со специјализирано лице или со вработените во земјоделските аптеки.

  • Листовите се деформирани и лепливи поради мали зелени инсекти - зелени вошки. Третирајте го вашето растение со Пиретрум или сличен систематичен инсектицид. 
    Претходно консултирајте се за дозата и начинот на употреба на инсектицидот со специјализирано лице или со вработените во земјоделските аптеки.



     


    Доколку сакате да изненадите некој од Вашите блиски, или пак да си го купите ова прекрасно растение за Вашиот дом, можете да го нарачате на следниот линк, со бесплатна достава до одбраната локација.

Последни објави

Совети за одгледување и промоции?